Навіны
18.05.2019">
18.05.2019<
Берасцейскі суд аштрафаваў яшчэ аднаго праціўніка завода АКБ
 
Як паведаміў БелаПАН праваабаронца Раман Кісляк, 17 мая суд Ленінскага раёна прызнаў Ірыну Сіліцкую вінаватай па арт. 23.34 КаАП (парушэнне парадку арганізацыі або правядзення масавых мерапрыемстваў) і аштрафаваў на пяць базавых велічынь (127,5 рубля) за ўдзел у шэсці праціўнікаў акумулятарнага завода па цэнтральных вуліцах горада 7 красавіка.
 
Праваабаронца нагадаў, што 11 мая гэтым жа судом за ўдзел у такім шэсці быў аштрафаваны на 40 базавых велічынь (1.020 рублёў) адзін з лідараў ініцыятыўнай групы, якая выступае супраць будаўніцтва акумулятарнага завода, Дзмітрый Бекалюк.
 
У красавіку таксама па арт. 23.34 КаАП былі аштрафаваныя 16 актывістаў: дзесяць — за ўдзел у шэсці праціўнікаў завода 7 красавіка, пяць — за ўдзел у аналагічным шэсці 14 красавіка, адна актывістка — за раздачу жоўтых надзіманых шароў 31 сакавіка на плошчы Леніна.
 
„Такімі рэпрэсіямі ўлады змагаюцца з пратэстам супраць гэтага завода”, — заявіў Кісляк.
 
Грамадская кампанія супраць акумулятарнага завода пачалася ў рэгіёне ў студзені 2018 года. За гэты час актывісты падалі заяўкі на правядзенне ў Берасці і Берасцейскім раёне 121 мітынгу, 12 пікетаў і 16 дэманстрацый. Улады санкцыянавалі толькі адну акцыю: 29 красавіка 2018 года мітынг „Брэстаўчанкі супраць свінцу”, на які сабралася каля дзвюх тысяч чалавек.
 
https://www.racyja.com/hramadstva/berastsejski-sud-ashtrafavau-yashche-adna/